الدجاج المشوى بالقرع العسلي

التدوينة دي عشان خاطر أماني خليل

***

الحقيقة يا أماني أنا نادرا ما لما بحس إني محتاجة أتكلم مع حد أو احكي حاجة لحد 

اتعودت من صغري إني أصنع سعادتي بمعزل عن الناس وعن الظروف المحيطة .. أما سلامي الداخلي فهو دايما وأبدا في تجنب العلاقات 

الصداقة .. التعود .. الرفقة .. الصحبة 

كل دي معاني مهمة بس دايما بيني وبينها جدار شفاف 

والناس بتنسى .. وأنا مابحش أفتكر 

بس إنتي يا أماني مانسيتيش وصفة أنا عملتها من أكتر من 5 شهور 

يمكن الناس تعتقد إن ده أمر بسيط .. بس أنا بعتبر وصفاتي زي قصائد الشعر بالنسبة للشاعر والروايات بالنسبة للروائي 

ده عالمي الخاص وابداعي 

عشان كده قررت النهاردة يا أماني أشاركك وصفة الدجاج المشوي بالقرع العسلي 

فكرة تكوين الوصفة مش بسيطة .. ناس كتير بتعتبر القرع العسلي من الحلويات مع إن طعمه العادي أقرب لطعم الكوسة 

مش حلو ومش مالح .. دايما محتاج حاجة تانية عشان تبروز الطعم 

فكرت في الحاجات التانية 

الفراخ طبعا أول اختيار .. سهلة وبسيطة وبتقبل كل المكونات 

الفلفل الأحمر عشان الحرارة واللون 

الكريمة عشان التوازن في كثافة الطبق 

والزعتر حبيب الفراخ وجوزة الطيب حبيبة الكريمة :) 

 

الحقيقة أنا لما فكرت في الوصفة وجربتها أول مرة ماكنتش ناوية خالص أصورها فيديو .. وتحديدا أول فيديو أظهر فيه للناس 

بس النصيب بقى 

قررت أصورها وبدأت أجهز المكان والأدوات وأظبط الكاميرا بس طبعا جيجي ماكانش سايبني في حالي :3

جه يشوف ايه اللي بيحصل 

 

ثم قرر يقعد لما المكان عجبه وأنا كنت مصدومة :3

نزلت جيجي وبدأت أصور وأجهز الصينية وده كان شكلها قبل ما تدخل الفرن

 

بعد ما خرجتها من الفرن كانت مذهلة وريحتها تحفة 

والأهم إن القرع العسلي كان بيدوب حرفيا في البق مع الكريمة اللي خلت الفراخ ناعمة جدا وطعمها راقي جدا 

 

وطبعا جيجي مافوتش الحدث وطلع يشوف الصينية لما خلصت 

 

وأنا كنت مبسوطة لأن ده كان أول فيديو أعمله والنتيجة كانت مرضية جدا 

 

أتمنى يا أماني كلامي والصور يكونوا يقدروا يعيشوكي معايا اليوم اللطيف ده 

وأتمنى تجربي الوصفة وتقولي لي رأيك 

هاتلاقي المكونات والطريقة في الفيديو هنا 

الباستا مع الدجاج والطماطم المجففة في الشمس

أنا بحب المكرونة

ويمكن زيها زي السمك بتفنن في طبخها بأكتر من طريقة

دايما بقول إني ساعات بحس إن معدتي فيها حفرة كبيرة ولا يمكن تتسد إلا بطبق مكرونة كبيرة

ميزة المكرونة إنها سهلة ..طيعة

ممكن يضاف إليها أي مكونات وهاتبقى طبق عظيم في ربع ساعة



وده اللي حصل امبارح

كنت جعانة جدا بعد الفجر وطبعا أول حاجة جت في بالي إني أعمل طبق مكرونة كبيــــــــــر جدا

في الأوقات اللي زي دي واللي مش ببقى محضرة فيها هاطبخ ايه أسهل حاجة بعملها إني يقف قدام التلاجة وأطلع الموجود فيها ومنه بعرف أعمل أكلة حلوة

برطمان الطماطم الممجففة .. عندي فراخ فيليه وسبانخ وزيتون إسود وصلصة

في توم وزيت زيتون

على خيرة الله

عملت طبق مكرونة يجنن بالمكونات الرائعة البسيطة دي واللي بعتقد إنها موجودة في كل بيت في أي وقت


وأكلت وشبعت وكنت مبسوطة جدا 

ودلوقتي هاكتب لكم الوصفة وأتمنى تعجبكم وتجربوها 

المقادير 

نصف كيس مكرونة أي نوع

ملعقة كبيرة صلصة طماطم

ملعقة كبيرة زيت زيتون 

3 فص توم مقطع شرائح

200 جرام دجاج فيلية مقطع شرائط طولية

نص كوب طماطم مجففة في الشمس مقطعة  

2 ملعقة كبيرة زيتون إسود حلقات

2 كوب أوراق سبانخ مغسولة 

ماء لسلق المكرونة

ملح

فلفل إسود

الطريقة

تسلق المكرونة في ماء مالح

يسخن وعاء عميق ثم يوضع فيه زيت الزيتون والدجاج ويقلب لمدة 3 دقائق

يرفع الدجاج من الوعاء ويضاف الثوم ويقلب حتى يذبل ثم تضاف الطماطم المجففة والصلصة ونص كوب من ماء سلق المكرونة 

تقلب الطماطم في الثوم وتعاد الدجاج للوعاء مرة أخرى ويتبل الجميع بالملح والفلفل

تضاف أوراق السبانخ والمكرونة المسلوقة والزيتون الأسود ويقلب وتقدم في الحال 

سمك السلمون على البخار مع الاسبارجوس والأرز بالبسلة والفاصوليا الخضراء

أنا بحب السمك 


اللي يعرفني يعرف إني بحب السمك بكل أنواعه وبكل طرق طبخه وإنه أكتر حاجة بتفنن في طبخها


ومن أكتر أنواع السمك اللي بحبها سمك السلمون 


لونه المميز وطعمه الحلو وسهولة وسرعة طبخه خلوه قريب قوي من قلبي وخلوني أعمله بأكتر من طريقة


النهاردة بقى قررت أجرب البامبو ستيمر بتاعي وأعمل فيه حتة سلمون للغدا 

 

والبامبو ستيمر للي مايعرفهوش عبارة عن مجموعة مصافي فوق بعض وليها غطا معمولة من خشب البامبو بيتحط فيها الأكل اللي عايزين نسويه بالبخار  وبتتحط على صينية فيها مية بتغلي والبخار بيتخلل المصافي ويسوي الأكل 

حطيت في المصفة الاسبارجوس وشرايح اللمون وشريحة السمك وسبته يستوي ولما دقته كان طعمه يجنن

الصراحة التحربة كانت أكتر من رائعة 

 

جنب السلمون عملت رز أبيض بالبسلة والفاصوليا الخضرا ونكهته بالحبهان وده كان حكاية لوحده 

 

في الآخر قدمت الغدا مع صوصات وتتبيلات زي الصويا صوص وتتبيله زيت الزيتون مع الخل البلسمي والزبادي بالمايونيز مع هريسة الشطة 

دلوقتي هاكتب لكم الوصفة وأتمنى تجربوها وتعجبكم 

  

 

سمك السلمون على البخار مع الاسبارجوس 

200 جرام اسبارجوس 

ليمونة مقطعة شرائح 

شريحة سلمون 

نصف ملعقة صغيرة ملح 

ربع ملعقة صغيرة فلفل إسود 

ملعقة كبيرة زيت زيتون

ملعقة كبيرة من صوص الصويا

الطريقة

يرص الاسبارجوس في مصفاة البخار ويتبل السلمون بالملح والفلفل الأسود ويوضع فوق الاسبارجوس

ترص شرائح اللمون فوق السمك 

تغطى مصفاة البخار بالغطاء وتوضع على صينية بها ماء يغلي لمدة 15 دقيقة

ترفع من المصفاة وتوضع في طبق التقديم وترش بزيت الزيتون وتقدم مع صوص الصويا

 ملحوظة 

إذا لم يتوفر البامبو ستيمر يمكن وصع مصفاة فوق حلة بها ماء يغلي وتغطي المصفاة لنفس المدة.

الأرز بالبسلة والفاصوليا الخضراء

المقادير 

كوب أرز بسمتي 

2 كوب ماء 

4 فصوص حبهان

ملعقة كبيرة زيت نباتي

ملعقة صغيرة ملح 

نصف كوب بسلة 

نصف كوب فاصوليا خضراء مقطعة 

الطريقة

في وعاء عميق يوضع الأرز والماء والزيت والملح وفصوص الحبهان ويغطى الإناء ويرفع على نار متوسطة لمدة ربع ساعة 

تضاف البسلة والفاصوليا ويقلب الأرز ويغطي وتخفض الحرارة وتترك لمدة ربع ساعة أخرى 

يرفع الأرز من على النار ويقدم مع سمك السلمون 

من مطبخ آسيا

من فترة مش طويلة نسبيا اتعرفت على آسيا عثمان 

آسيا كاتبة ومدونة ومصورة وفوود ستايلست بالإضافة لإنها مقدمة برنامج طبخ راقي ومختلف اسمه مطبخ آسيا على قناة ست البيت المصرية

بعد فترة مش طويلة وبتدبير ربنا أنا وآسيا بقينا أصحاب وأصدقاء مقربين جدا على الرغم من إننا ماتقابلناش ولا مرة لحد دلوقتي

اتكلمنا كتير واتناقشنا كتير ودايما كان كلامنا عن حلم آسيا إن يكون ليها كتاب طبخ باسمها في المكتبة المصرية خاصة إن كتبها السابقة ماتوزعتش في مصر

الحمد لله وبفضله كتاب آسيا صدر النهاردة واتوزع في المكتبات المصرية 

مبروك يا آسيا 

وبالتوفيق دايما يا رب 

 

وبالمناسبة دي ولأني أول واحدة تمسك الكتاب في إيدها فأنا قررت أطبق منه أكتر من وصفة وأعرضها عليكم هنا في المدونة 

وزي ما أنا حبيت الكتاب وحبيت روح آسيا الحلوة اللي بتطل من كل وصفة وكل صورة .. أتمنى إنتم كمان تجيبوا الكتاب وتطبقوا وصفاته وتقربوا من روح آسيا الجميلة النقية 

الكتاب متوفر في عمر بوك ستور .. مكتبة أقلام عربية 

وسلسلة مكتبات ألف

وقريب في فيرجن ميجا ستور وديوان 

أنا وجولي وجوليا

إلى إيهاب

أنت زبدة خبزي وبهجة أيامي

*** 

بما إني عملت البوف بورجينيون وحاسة إني في مود يخليني أتكلم عن جولي باول وجوليا تشايلد فأنا عايزة أقول إن جولي وجوليا أكتر شخصيتين شفتهم في فيلم وأثروا فيا .. كل واحدة فيهم فيها حتة مني .

الإتنين زيي تمام السياسة بتحاوطهم من كل ناحية وكل واحدة منهم عايزة تهرب منها ومش عارفة تروح فين ، جولي بتخرج وتقابل صاحباتها ومش بتلاقي نفسها وسطهم أبدا وجوليا بتحاول كل يوم تتعلم حاجة جديدة .

جولي عدت التلاتين وكل انجازاتها في الحياة إنها موظفة ومتجوزة زيي تمام وجوليا اتجوزت أصلا بعد ما الكل فقد الأمل في إنها تتجوز .. برضه زيي تمام !

وكل واحدة فينا اتجوزت الراجل اللي كأنه متفصل تماما على مقاس أحلامها 

يا ترى ايه الشئ اللي ممكن ينقذنا إحنا التلاتة ؟!!!!!

أنا اللي عايشة في القاهرة 2015 

 وجولي اللي عايشة في نيويورك 2002

 وجوليا الأمريكية اللي عايشة في فرنسا سنة 1949 ؟

الطبخ كان هو المنقذ .. جوليا اتعلمت الطبخ لأن كان عندها وقت فراغ كبير فعملت الشئ اللي يسعدها ويحسس جوزها بحبها.

 وجولي بدأت مشروعها "جولي/جوليا" عشان كانت عايزة تلزم نفسها بحاجة تخليها دايما مشغولة وماتحسش بالفراغ واللاجدوى ومن خلال المشوع عرفت المتعة ووصلت للي كانت بتتمناه وهي إنها تبقى كاتبة ناحجة .

أنا بقى مش عارفة إزاي اندمجت في مشروعي ده .. بس اللي فاكراه إن كان في ليلة صعبة قوي مرت عليا .. كنا بعد الثورة بكذا شهر وفي قلب معركة الانتخابات أولا ولا الدستور أولا.  

كنت مندمجة بكل كياني في المعركة وبقرا مقالات وبدخل مناقشات وبحاول أجذب أكبر عدد من الناس لوجهة نظري ومرة واحدة عيطت قدام شاشة اللاب توب .. فضلت أعيط وانتحب لأكتر من ساعة .

قفلت اللاب ودخلت المطبخ وعملت شوربة سي فود وجمبري مشوي وجهزت طاجن المكرونة بأربع انواع من الجبنة ومشروم بالزبدة وبودينج الأرز مع اللبن وفواكة مشوية مع صوص البرتقال ورتبت المطبخ . الليلة دي قضيت في المطبخ اكتر من 7 ساعات متواصلين ولحظة ما خرجت من المطبخ أدركت إني لما كنت بطبخ مافكرتش ولا لحظة ايه الأهم الدستور ولا الانتخابات وساعاتها عرفت إن الطبخ هو اللي أنقذني .

من جولي وجوليا اتعلمت حاجة مهمة قوي .. اتعلمت إن الكتابة عن الطبخ مش كتابة درجة عاشرة وإن كتب الطبخ مش أقل أهمية من كتب الأدب والسياسة .

دأب جوليا وكفاحها عشان تحقق كل الوصفات اللي في الكتاب قبل نشره علمني إن ما أديش وصفة لحد او أسعى لنشرها بدون ما أجربها بنفسي وإن دي أمانة ربنا هايحاسبني عليها . 

فرحة جولي بكتابها وسعادتها وهي بتقول "I'm a writer  " إديتني ثقة في نفسي وحسستني إني بكتب في واحد من العلوم الإنسانية المهمة وإديتني ثقة في المستقبل .

لكن الشئ الأهم اللي اتعلمته من جولي ومن جوليا وشفته بنفسي إن الأكل الحلو والإستمتاع بيه مع كل الناس اللي بنحبهم هو أكتر شئ مفرح ممكن نقابله في حياتنا كلها .

                                                                               

Bon Appétit

  

البيف بورجينيون على طريقة جوليا تشايلد

من وقت ما اتفرجت على فيلم جولي وجوليا ولفتت نظري وصفة البيف بورجينيون اللي جولي بتعملها على طريقة جوليا عشان تقدمها لواحدة من ضيوفها المهمين اللي كانت بتشتغل ناقدة طعام 

جولي عملت الوصفة مرتين لحد ما ظبطتها بس للأسف ناقدة الطعام لغت الزيارة

أنا كمان قريت كتير عن الوصفة وقريت تفاصيلها وجربتها أكتر من مرة لحد ما أتقنتها تماما 

البيف بورجينيون في المطبخ الفرنسي بيتقدم جنبها بطاطس مهروسة. والحقيقة موسم الخضار السنة دي سئ جدا بس أنا اجتهدت بشكل كبير عشان أوفر أفضل منتجات للوصفة.

عملتها امبارح ومن حسن حظي إن كان عندي ضيفة عزيزة وغالية قوي على قلبي .. فاتن أختي اللي حضرت معايا سيشن التصوير وتعبت معايا وإنا بختار البروبس اللي استخدمها 


في الأول صورت البطاطس المهروسة 

بعد كده غيرنا الخلفية وصورنا البيف بورجينيون 

 

بعد كده قدمنا الأكل وخدنا صورة أخيرة

 

ودي بالتفصيل وصفة البيف بوجينيون على طريقة جوليا تشايلد 

أتمنى تعجبكم 

المقادير

6 شرائح بيكون بقري مقطعة مكعبات

كيلو لحم بقري من منطقة الخاصرة مقطع مكعبات كبيرة

2 بصل أبيض كبير مقطعة شرائح

3 جزرات متوسطة مقطعة مكعبات كبيرة

ملح وفلفل إسود

2 ملعقة كبيرة دقيق

3 أكواب عصير عنب غير محلي 

نصف كوب خل عنب أحمر

3 أكواب مرقة لحم

ملعقة كبيرة معجون طماطم (صلصة من البرطمان)

2 فص ثوم مفروم

نصف ملعقة صغيرة زعتر جاف

ورقة لورا واحدة مطحونة 

ربع كيلو بصل قاورمة (البصل الصغير الذي يتم تخليله)

باقة من الأعشاب العطرية ملفوفة في قطعة شاش نظيفة وهي عبارة عن (ربع حزمة بقدونس ـ ورقة لورا ـ 5 أعواد زعتر أخضر)

عبوة مشروم طازج 

ملعقة كبيرة من الزيت النباتي 

حلة مناسبة للطهى البطئ (من الحديد الزهر أو الفخار ذات غطاء محكم)

الطريقة

تسخن طاسة على النار ويحمر البيكون حتى تسيح كل دهونه ويصبح مقرمشا ثم يوضع في طبق جانبا حتى استخدامه.

تزال كل الدهون العالقة بالطاسة وتوضع جانبا وترفع الطاسة مرة أخري على النار حتى تسخن.

تجفف قطع اللحم تماما وتتبل بالملح والفلفل الأسود وتغطى بالدقيق وتوضع طبقة واحدة من اللحم في الطاسة وتحمر من كل الجهات حتى يصبح لونها بنيا.

بعد تحمير كل مجموعة توضع في إناء الطهي البطئ حتى الإنتهاء من تحمير اللحم كله.

وفي النهاية نضع ربع كوب من عصير العنب الأحمر غير المحلى في الطاسة ويقلب بملعقة خشبية حتى الحصول على كل رواسب عملية التحمير التي تبقت في الطاسة. ثم يصب على اللحم في الإناء.

يعاد دهن تحمير البيكون إلي الطاسة ويحمر البصل مع إضافة القليل من الملح حتى يتكرمل ويصبح بني اللون ثم يرفع من الطاسة ويوضع جانبا.

يضاف الجزر إلى الطاسة ويقلب حتى يطرى ويضاف إليه الثوم ويقلب حتى تظهر رائحة الثوم.ثم يضاف أخيرا معجون الطماطم ويقلب معهم حتى يمتزجوا معا.

يضاف الجزر إلي حلة الطهي البطئ.

تنضف الطاسة ويضاف إليها الزيت النباتي وترفع على النار حتى تسخن ثم يضاف إليها المشروم ويقلب حتى يصبح ذهبي اللون ويرفع من الطاسة ويترك جانبا.

في النهاية نضيف إلي حلة الطهي البطئ ملعقة صغيرة من الملح والزعتر الجاف ووقة اللورا المطحونة والشاشة التي تحتوي على الأعشاب العطرية والشوربة وباقي عصير العنب الأحمر والخل ويغلق الإناء جيدا ويدخل فرن منخفض الحرارة لمدة 4 ساعات 

قبل التقديم مباشرة يضاف البصل والمشروم والبيكون البقري المحمص إلى إناء اللحم ويطبخ مرة أخرى لمدة ربع ساعة.

تزال الشاشة التي بها بقايا الأعشاب العطرية ثم يقدم البيف بورجينيون ساخنا مع البطاطس المهروسة

ملحوظة 

قمت باستبدال البيكون بالبيكون البقري والنبيذ الأحمر بمزيج خل العنب وعصير العنب الأحمر الخالي من السكر

الأرز بالكلاوي

في الواقع أنا ماكنتش ناوية أصور النهاردة 

وكنت جعانة جدا ففكرت في أبسط وأسرع حاجة ممكن تتعمل .. كلاوي باللية وجنبها رز أبيض وسلطة

وأثناء ما كنت بطبخ فكرت في إني أصور صورة بسيطة أجرب بيها مكان التصوير الجديد


وكانت الصورة دي مع وصفة الرز بالكلاوي :) 

الأرز بالكلاوي

المقادير 

4 أكواب أرز مصري

6 أكواب شوربة لحم أو ماء

 
ملعقة كبيرة ملح

ملعقة كبيرة زيت نباتي

نصف كيلو كلاوي منظفة جيدا ومقطعة شرائح رقيقة

ربع كوب زيت نباتي أو لية خروف مفرومة 

ملعقة كبيرة ملح

ملعقة صغيرة فلفل أسود

ملعقة صغيرة كمون 

4 حبات حبهان

ربع كوب بقدونس مفروم للتزيين

الطريقة

في إناء محكم الغطاء نقوم بتسوية الأرز 

يقلب الأرز في ملعقة زيت نباتي لمدة دقيقتين ثم يضاف الماء والملح ويغطى ويترك على النار لمدة 10 دقائق 

تخفض النار لأقل درجة ممكن ويترك لمدة 15 دقائق أخري

تسخن طاسة كبيرة ويوضع فيها الزيت النباتي أو لية الخروف وتترك لمدة دقيقتين حتى يسخن الزيت أو تسيح دهون اللية

توضع شرائح الكلاوي والحبهان في الطاسة وتقلب لمدة 15 دقائق أو حتى تمام النضج

تتبل بعد نضجها بالملح والفلفل الأسود والكمون

يوضع الأرز في طبق التقديم ويغرف فوقه الكلاوي ويزين بالبقدونس ويقدم ساخنا

لنعبر الطريق

تأخذنا الحياة بعيدًا.. نضل الطريق.. نفقد أحبابنا دائمًا.. نفقد أنفسنا أحيانًا وتغيب الأرض من تحت أقدامنا.

في فترات الضلال هذه أشعر أني كالغريق الذي يبحث عن قشة يتعلق بها.

أريد أن أطبخ لكني لا أريد أن آكل. ربما يساعدني قدر الطهي البطيء لحل هذه المعادلة الصعبة. ولكن كيف أستطيع أن أجد حلاً لهذه المعادلة عندما أغير المعطيات؟!

كيف مثلاً أستطيع أن أخرج بينما لا أريد أن أري أحدًا؟

كيف أستطيع أن أعود إلى منزلي بينما لا أريد لأنفاسي أن تنقطع فوق درجات لا ترحم؟

كيف أرى القمر من شرفة محاطة بأبراج خرسانية لا تُقدّر حاجتي إلى النور؟

يضطرب كل شيء بداخلي وأتكور على نفسي.

كل شيء عندي يتساوى مع كل شيء، وأدور في دائرة مفرغة.

أخاف أن يبتلعني العدم فأبحث عن كل ما أحب.. عن كل من أحب.

أشياء كثيرة حولي تلهمني طريق العودة.

يبعث الله لي طوق نجاة يعيدني إلى نفسي.. يلهمني الصواب فأنظر حولي لأبدأ من جديد.

أحيانًا طوق نجاتي يتمثل في قطي الصغير.

 

حينما أستيقظ من نومي صباحًا لأجده في انتظاري بجوار السرير.. يمسح برأسه الصغيرة في قدمي ويلف حولي.

آخده ونجلس في المطبخ على الأرض، أسند ظهري للحائط وأطعمه قطع الجبن ونخرج من المطبخ معًا لنبدأ يومًا جديدًا.

أحيانا طوق نجاتي يتمثل في دفاتري الملونة.

  

أجمعها فقط لمثل هذه الأوقات.. أوراقها اللا نهائية ترحب بي.. تحتضني.. أسكب فيها فراغ روحي والعدم الذي يحاصرني، فتملؤني بحب الحياة من جديد.

وعندما أمتلئ بحب الحياة من جديد يكون أول مكان أبحث فيه عن سعادتي هو المطبخ.

في طريقي إلى المطبخ أضع مكتبة تحتوي على كتب الطبخ التي أحبها.

أجمعها لمثل هذه الأوقات.. قراءتها تلهمني طريقة جديدة للحياة.. طعمًا جديدًا.. نكهة جديدة.. رشة من التوابل تعيد إلى حياتي الطعم من جديد.

بينما مرشدي جيمي أوليفر يراقب الوضع ويوجهني عند الحاجة.