أنا وجولي وجوليا

إلى إيهاب

أنت زبدة خبزي وبهجة أيامي

*** 

بما إني عملت البوف بورجينيون وحاسة إني في مود يخليني أتكلم عن جولي باول وجوليا تشايلد فأنا عايزة أقول إن جولي وجوليا أكتر شخصيتين شفتهم في فيلم وأثروا فيا .. كل واحدة فيهم فيها حتة مني .

الإتنين زيي تمام السياسة بتحاوطهم من كل ناحية وكل واحدة منهم عايزة تهرب منها ومش عارفة تروح فين ، جولي بتخرج وتقابل صاحباتها ومش بتلاقي نفسها وسطهم أبدا وجوليا بتحاول كل يوم تتعلم حاجة جديدة .

جولي عدت التلاتين وكل انجازاتها في الحياة إنها موظفة ومتجوزة زيي تمام وجوليا اتجوزت أصلا بعد ما الكل فقد الأمل في إنها تتجوز .. برضه زيي تمام !

وكل واحدة فينا اتجوزت الراجل اللي كأنه متفصل تماما على مقاس أحلامها 

يا ترى ايه الشئ اللي ممكن ينقذنا إحنا التلاتة ؟!!!!!

أنا اللي عايشة في القاهرة 2015 

 وجولي اللي عايشة في نيويورك 2002

 وجوليا الأمريكية اللي عايشة في فرنسا سنة 1949 ؟

الطبخ كان هو المنقذ .. جوليا اتعلمت الطبخ لأن كان عندها وقت فراغ كبير فعملت الشئ اللي يسعدها ويحسس جوزها بحبها.

 وجولي بدأت مشروعها "جولي/جوليا" عشان كانت عايزة تلزم نفسها بحاجة تخليها دايما مشغولة وماتحسش بالفراغ واللاجدوى ومن خلال المشوع عرفت المتعة ووصلت للي كانت بتتمناه وهي إنها تبقى كاتبة ناحجة .

أنا بقى مش عارفة إزاي اندمجت في مشروعي ده .. بس اللي فاكراه إن كان في ليلة صعبة قوي مرت عليا .. كنا بعد الثورة بكذا شهر وفي قلب معركة الانتخابات أولا ولا الدستور أولا.  

كنت مندمجة بكل كياني في المعركة وبقرا مقالات وبدخل مناقشات وبحاول أجذب أكبر عدد من الناس لوجهة نظري ومرة واحدة عيطت قدام شاشة اللاب توب .. فضلت أعيط وانتحب لأكتر من ساعة .

قفلت اللاب ودخلت المطبخ وعملت شوربة سي فود وجمبري مشوي وجهزت طاجن المكرونة بأربع انواع من الجبنة ومشروم بالزبدة وبودينج الأرز مع اللبن وفواكة مشوية مع صوص البرتقال ورتبت المطبخ . الليلة دي قضيت في المطبخ اكتر من 7 ساعات متواصلين ولحظة ما خرجت من المطبخ أدركت إني لما كنت بطبخ مافكرتش ولا لحظة ايه الأهم الدستور ولا الانتخابات وساعاتها عرفت إن الطبخ هو اللي أنقذني .

من جولي وجوليا اتعلمت حاجة مهمة قوي .. اتعلمت إن الكتابة عن الطبخ مش كتابة درجة عاشرة وإن كتب الطبخ مش أقل أهمية من كتب الأدب والسياسة .

دأب جوليا وكفاحها عشان تحقق كل الوصفات اللي في الكتاب قبل نشره علمني إن ما أديش وصفة لحد او أسعى لنشرها بدون ما أجربها بنفسي وإن دي أمانة ربنا هايحاسبني عليها . 

فرحة جولي بكتابها وسعادتها وهي بتقول "I'm a writer  " إديتني ثقة في نفسي وحسستني إني بكتب في واحد من العلوم الإنسانية المهمة وإديتني ثقة في المستقبل .

لكن الشئ الأهم اللي اتعلمته من جولي ومن جوليا وشفته بنفسي إن الأكل الحلو والإستمتاع بيه مع كل الناس اللي بنحبهم هو أكتر شئ مفرح ممكن نقابله في حياتنا كلها .

                                                                               

Bon Appétit